• နိုင်ငံခြား ငွေလဲနှုန်း ဧပြီ ၁ က စပြီး ပေါက်ဈေးရှင် သတ်မှတ်မယ်

မြန်မာပြည် ဈေးကွက်တွင် နှုန်းထားအမျိုးမျိုး ဖြစ်ပေါ်နေသော ငွေလဲနှုန်းများကို တမျိုးတည်း ပေါင်းစည်းနိုင်ရေး (unification of exchange rate)အား လာမည့် ၂၀၁၂ ခုနှစ် ဧပြီလ ၁ ရက်နေ့တွင် စတင်တော့မည်ဖြစ်ပြီး သက်ဆိုင်ရာ ဘဏ်အသီးသီးသို့ အကြောင်းကြားထားပြီဖြစ်ကြောင်း သိရှိရသည်။

ယင်းကဲ့သို့တရားဝင်ငွေလဲနှုန်း ပြောင်းလဲသတ်မှတ်မှုကြောင့် ယင်းစနစ်အကောင်အထည်ပေါ်လာပါက မြန်မာနိုင်ငံအတွင်းသို့ ၀င်ရောက်လာသော ပြည်ပရင်နှီးမြုပ်နှံမှုများ အတွက်လည်း ဈေးကွက်ပေါက် ဈေးဖြင့် လဲလှယ်သတ်မှတ်နိုင်တော့ မည်ဖြစ်ကြောင်း သိရှိရသည်။

နိုင်ငံခြားငွေ လဲလှယ်ရောင်းဝယ်ခွင့် လိုင်စင်ရရှိမည်ဟု ယူဆရသည့် အင်းဝဘဏ်၊မြဝတီဘဏ်၊ မြန်မာ့မွေးမြူရေးနှင့် ရေလုပ်ငန်းဘဏ်၊ မြန်မာ့ စက်မှု ဖွံ့ဖြိုးရေး ဘဏ်၊ မြန်မာအရှေ့တိုင်းဘဏ်နှင့် ကမ္ဘောဇ ဘဏ် ဘဏ်ခြောက်ခုမှ အကြီးတန်း ဝန်ထမ်းများကို မြန်မာနိုင်ငံတော် ဗဟိုဘဏ်က သင်တန်းပေးခဲ့သည်ဟုလည်းသိရသည်။

မြန်မာနိုင်ငံတွင် ငွေလဲနှုန်း အမျိုးမျိုး ဖြစ်နေခဲ့သည်မှာ နှစ်ပေါင်း ၄၀ ကျော် ကြာမြင့်ခဲ့ပြီ ဖြစ်သောကြောင့် ပြောင်းလဲရန် နည်းပညာ ရပ်ပိုင်းဆိုင်ရာနှင့် အကျိုးဆက်များကို ထိန်းသိမ်းနိုင်မည့် mechanism တစ်ခု လိုအပ် နေကြောင်း သုံးသပ်မှုများလည်း ရှိသည်။ ''ဒီငွေလဲနှုန်း တစ်မျိုးတည်း ပေါင်းစည်းရေးနဲ့ ပတ်သက်ပြီး ကိုယ့်တိုင်းပြည်ရဲ့အခြေအနေဟာ နောက်ကျကျန်ခဲ့တာမျိုးရှိသလို လက်ရှိမှာ အောင်မြင်အောင်လုပ်ဖို့ လိုအပ်နေတာလည်း အမှန်ပဲ။ တာဝန်ရှိသူဝန်ထမ်းတွေရဲ့ capacity ပိုင်းအဆုံးအများကြီး အရေးကြီးတယ်။ ကျွမ်းကျင်ဝန်ထမ်းတွေ အပြင် ထင်သာမြင်သာရှိမှုတွေကိုလည်း အရင်ဆုံး ပြုစုပျိုးထောင်ထားဖို့လိုတယ်''ဟု ကမ္ဘောဇဘဏ် ဒုတိယဥက္ကဋ္ဌ ဦးသန်းလွင်က ပြောသည်။

အစိုးရအနေဖြင့် နိုင်ငံခြားငွေနှင့် ပတ်သက်၍ ဥပဒေများကို တိတိကျကျ ပြဋ္ဌာန်းကာ နိုင်နိုင်နင်းနင်း ဆောင်ရွက်နိုင်ရန် လိုအပ်ကြောင်း၊ ယင်းကဲ့သို့ မပြုလုပ်နိုင်ပါက နိုင်ငံခြားငွေ မှောင်ခိုဈေးကွက် မြန်မာနိုင်ငံအတွင်း ကျယ်ပြန့်နေဦး မည် ဖြစ်ကြောင်း“အရင်ကတည်းက ဘယ်သူမှတော့ မှောင်ခိုမှာ သွားပြီးရောင်းချင် ဝယ်ချင် ကြတာတော့ မဟုတ်ဘူး။ ငွေလဲနှုန်း ဥပဒေ နိုင်နိုင်နင်းနင်း လုပ်နိုင်မှ မှောင်ခိုဈေးကွက်တွေက ပျောက်နိုင်မှာပေါ့” ဦးခင်မောင်ညို (ဘောဂဗေဒ) က ပြောသည်။

 လက်ရှိမြန်မာနိုင်ငံတွင် တရားဝင် နိုင်ငံခြားငွေများ လဲလှယ်နိုင်ရန်အတွက် မြန်မာ့ရင်းနှီးမြှုပ်နှံမှုနှင့် ကုန်သွယ်မှုဘဏ် MICB နှင့် မြန်မာ့နိုင်ငံခြား ကုန်သွယ်မှုဘဏ် MFTB တို့ကသာ ဝန်ဆောင်မှု လုပ်ကိုင်ပေးနေသည်။နိုင်ငံခြားသုံးငွေ စည်းမျဉ်း ဥပဒေပုဒ်မ ၅ အရ မြန်မာအတွင်းနေထိုင်သူ မည်သူမဆို နိုင်ငံခြား သုံးငွေ အုပ်ချုပ်ရေးမှူး၏ ခွင့်ပြုချက်ဖြင့်သာ ကိုင်ဆောင်ခွင့်ရှိပြီး၊ နိုင်ငံခြားသုံးငွေ စီမံခန့်ခွဲ့မှုဌာနတွင် နိုင်ငံခြားငွေ ကိုင်ဆောင်ခွင့် လိုင်စင် Foreign Exchange Acceptor & Holder License ကို လျောက်ထားပြီးမှ ကိုင်ဆောင် နေကြရသည်။
 
သြဂုတ်လ ၃ဝ ရက်နေ့က အထက်လွှတ်တော် ဒုတိယ ပုံမှန်အစည်းအဝေးတွင် စစ်ကိုင်းတိုင်းဒေသကြီး မဲဆန္ဒနယ် အမှတ် ၉ မှ ဦးသိန်းဝင်း တင်သွင်းထားသည့် “ဘဏ္ဍာရေးနှင့် အခွန်ဝန်ကြီးဌာနမှ စီမံခန့်ခွဲသော ဥပဒေများမှ ပယ်ဖျက်၊ ပြင်ဆင်၊ ဖြည့်စွက်သင့်သော ဥပဒေများကို ပယ်ဖျက်၊ ပြင်ဆင်၊ ဖြည့်စွက်ရန် ပြည်ထောင်စုအစိုးရအား တိုက်တွန်းကြောင်း” အဆိုကို ရန်ကုန်တိုင်း မဲဆန္ဒနယ် အမှတ် ၂ မှ ဦးညွန့်တင်က ဆွေးနွေးသည်။

ယင်းအဆိုကို ဘဏ္ဍာရေးနှင့်အခွန်ဝန်ကြီးဌာန ပြည်ထောင်စု ဝန်ကြီး ဦးလှထွန်း က လက်ရှိခေတ်ကာလ အခြေအနေနှင့် ကိုက်ညီအောင် ပြင်ဆင်ဖြည့်စွက်လျက်ရှိပြီး ပြဋ္ဌာန်းနိုင်ရန်အတွက် ဥပဒေမူကြမ်းကို ကျင်းပလျက်ရှိသည့် ပြည်ထောင်စုလွှတ်တော်တွင် တင်သွင်းထားပြီးဖြစ်ကြောင်း The Foreign Exchange Regulation Act ၊ The Pension Act၊ မြန်မာနိုင်ငံတော် ဗဟိုဘဏ် ဥပဒေ၊ မြန်မာနိုင်ငံတော် ငွေရေးကြေးရေး အဖွဲ့အစည်းဥပဒေ တို့အား ခေတ်စနစ်နှင့် အညီ လိုအပ်သည်များကို ပြင်ဆင် ဖြည့်စွက်ရန် အတွက် ပြည်ထောင်စုရှေ့နေရုံးချုပ်နှင့် ညှိနှိုင်းထားပြီးဖြစ်ကြောင်းလည်း ပြန်လည်ဖြေကြားခဲ့သည်။

·                                 နိုင်ငံခြား ငွေလဲနှုန်း ဧပြီ ၁ က စပြီး ကျပ် ၈၀၀ ၀န်းကျင် သတ်မှတ်မယ် bbc